Euskal Idazleen Elkartea

Bilboko 39. Liburu Azoka

Ekainaren 4tik 15era, Bilboko Arenalean, Bilboko 39. Liburu Azoka ospatuko da. Muniategi azokaren koordinatzailearen esanetan, azokak "berrikuntza asko" izango ditu, hainbat standekin, eta "ederra" izango da, bai kanpoan bai barruan. Poesia sail bat izango du, eta, bertan, Bizkaiko Elkarte Artistikoaren Poesia lehiaketako irabazleak errezitaldia eskainiko du.

Benedetti, maiatzaren 17an hil zen idazle uruguaiarraren omenezko erakusketa bat inauguratuko dute, Bidebarrietako pabilioian. Hilaren 10ean, berriki zendutako poetaren omenez, hainbat euskal poetak eta gerturatzen den publikoak haren poemak irakurriko dituzte.

Era berean, eleberri historikoari eskainitako sail bat, "Genero indarkeriaren aurkako begiradak" izeneko beste bat, "Pasaje a la India" izeneko hitzaldia eta ikus-entzunezkoa eta Eleberri Beltzaren IV. Topaketak izeneko ekimena izango dira.