Gure programak > IDAZLEAKAZ
Euskal Idazleen Elkarteak ikasgeletan euskal literatura lantzeko egitasmo berri bat aurkeztu nahi dizu: IDAZLEAKAZ izenekoa, hain zuzen ere. Bizkaiko Foru Aldundiaren laguntzari esker burutuko du programa, eta Bizkaiko ikastetxe guztiek duzue parte hartzeko aukera.
Egitasmo horren baitan, bi jarduera mota antolatu ditugu 2011-2012 ikasturterako:
- IDAZLEAKAZ. Idazle baten liburua landu eta ondoren, horri buruzko solasaldia. EIEtik idazle eta liburu zerrendak aurkeztuko dizkizuegu eta zuek aukeratuko duzue ze idazle eta liburu nahi duzuen. Eskaria onartuz gero, idazlearekin eguna adostu eta solasaldi bat izango duzue ikasgelan.
- BI-2. Bi idazle bizkaitar jarriko ditugu harremanetan. Bata zaharra, "klasikoa", euskara batuaren aurrekoa, eta bizkaitarrez idatzi zuena; bestea, berriz, gaurkoa, bizirik dagoena eta liburuak argitaratzen dituena, batuaz, baina bere tradizioaren eta herri mintzairaren jabe dena. Iraganeko idazle haren lana, honako idazlearen ahotsean aurkeztuko dugu, idazle biok herri edo eskualde berekoak direla abiapuntutzat hartuta. Idazle "zaharra" ezagutzeko bidea egungo idazlea izango da; haren begietatik ikusiko dute ikasleek zer egiten zuen eta zergatik merezi duen berreskuratzea.
Hori guztia saio batean gauzatuko da: idazleak "klasikoaren" lagin bat aurkeztuko du eta horren inguruko solasa egin.
Egitasmo honekin, gure ondarea ezagutzeko bidea eman nahi diegu Bizkaiko ikasleei; eta, horretarako, EIEk eta Bizkaiko Foru Aldundiak bere ekarpena eskaintzen diete ikastetxeei. Lehen ikasturtea izango da honakoa eta espero dugu zuen gustukoa izatea.
| |
 |
Programa hau Bizkaiko Foru Aldundiaren laguntzari esker egiten da |
| |
|
|
