Idazleak - Patziku Perurena Loyarte - Biografia

Patziku Perurena Loyarte

Goizuetan, 1959.

Gurasoak eta auzoak nekazariak izanik, euskara hutsez bere inguruari gogobihotzez atxekitako gizarte batean hazi zen, hamabi urte zituela Leitzara bizitzera joan zen arte.

O.H.O.ko ikasketak eta Lanbide Eskolakoak gazteleraz Leitzan bertan burutu, eta hamasei urtetan joan zen Arrasatera, eta hango Eskola Politeknikoan Injineritza egiten ari zela, hasi zen bere betiko euskara lantzen eta ikasten beregisa, eta era batean edo bestean, ahalegin horretan segitu izan du egundaino.

"Udaldi batez Joseba Sarrionandiak Leitzan emandako literatur ikastaro batzuengatik piztuko zitzaidan euskal literaturaganako zaletasuna; eta gero, handik urte batzuetara, Eduardo Gil Bera ezagutu nuena esker, bideratu atzera galdutako nortasuna eta izena: Patziku; artean Patxi erabili baitnuen. Geroztik beti aitortu izan dut, bi argigile bihotzeko horiekiko mirespena eta eskerra", adierazten du.

Olerkien bitartez eman zuen bere burua ezagutzera, Joannes d'Iraolaren poema bilduma (1985) liburuarekin. Irun saria irabazi zuen lan honi esker. Bere poesia aztertzen duenean, Koldo Izagirrek "usainak, hotsak, dastak, koloreak... hau da, naturaren ñabardura guztiak izendatzeko ahalmena duena, «belar moztu eta ez moztu bakoitzaren usaina» zehazki nolakoa den dakiena, Patziku Perurena da" idazten du.

1987. urtean Emily eleberria argitaratu zuen. Eta "heteronimo" gisa erabili zuen, ondoren poema sorta kaleratzeko Emily pertsonaiaren izenean.

Pentsalari eta artikulugile lanetan ere aritu da Harripilatan ezkutatzen zeneko apo tipiaren burutazioak, Marasmus femeninus...

Ikerketa filologikoa ere landu du Euskarak sorgindutako numeroak eta Koloreak euskal usarioan eta lan etnografikoa idatzi du Leitzako historiari buruz Leitzako errege-erreginak.