Jon Alonso Fourcade
Biografia - Kurrikuluma
Iruñea,1958.
Biologian lizentziatua da. Zortzi urte zituela ikasi zuen euskara, bere gurasoen erabakiz, Pedro Diez de Ulzurrun apaizaren irakatsiei esker. AEK-ko irakasle modura lan eskarmentua izateaz gainera, Iruñako udal ikastola batean irakatsi du eta Nafarroako Legebiltzarrean eta Gobernuan aritu izan da itzultzaile lanetan.
1995ko Mikel Zarate saiakera saria eskuratu zuen liburuan, Idiaren eraman handia, sorkuntza lanaz jarduten zuen. Honez gainera, 1998. urtean Joseba Jaka Literatur Beka eskuratu zuen Toulouse-Lautrec XX. Mende hasierako pintore frantziarraren gaineko saiakera-eleberriari esker.
Juanjo Olasagarreren El Africa de Mandela gaztelerara itzuli du eta Jose Saramago Nobel sari portugaldarraren Lisboako setioaren historia euskaratu.
Asisko Urmenetarekin batera, gazte euskaldunak xede zituen lokuzio liburua argitaratu zuen; Mantxut titulupean, umorez beteriko lokuzioak asmatu zituzten.
2001. urtean Juan Zelaia saiakera laburren saria lortu zuen, Agur Darwin (eta beste arkeologia batzuk) entseguarekin.
Hainbat komunikabidetan kolaboratzaile lanetan aritu da: Argia,Egunkaria,Berria,Nabarra...). Ipuingintza lantegiak ere ematen ditu herriz herri (Hernani, Ondarroa, Elzondo, Berriozar, Iruñea, Arrasate, Lezo...).
Euskadi Irratiako Sormenari leiho literatur programa ere kudeatu izan du bi urtetan.